PEUTING JEUNG PANGHAREPAN
Cipt. Mang Koko
Jep! Angin entong nyoara
Bongan henteu mawa beja
Geus bentang, ulah ngiceupan
Bongan teu mawa titipan
Mega anggur geura leumpang
Pek pindingan itu bulan
Bongan neuteup ti tatadi
Tapi henteu mawa jangji
Duh peuting ku teungteuingeun
Datang ukur mawa keueung
Henteu ngirim pangharepan
Henteu beja-beja acan
Boro lila ditungguan
Sugan anjeun babawaan
Datang mawa pihapean
Talatah iber jungjunan
Duh untung mun boga jangjang
Rek hiber arek diteang
Hayang buru-buru terang
Katineung nu didagoan
Hayang meunang kacindekan
Anu jadi panyileukan
Naha baris kalakonan
Atawa ukur impian
